Shefi ekzekutiv i prodhuesit amerikan të çipave Broadcom, Hock Tan gjatë ditës tha se do të përpiqet të bindë zbatuesit e antitrustit të BE-së se oferta e tij e propozuar prej 61 miliardë dollarësh për firmën e kompjuterave cloud VMware, e cila ka shkaktuar shqyrtim në të dy anët e Atlantikut, është pro konkurrencës.
Tan, i rrethuar nga drejtuesit dhe avokatët e tij, arriti të premten herët në mëngjes në Bruksel për një seancë të mbyllur dëgjimore mbi një nga lidhjet më të mëdha në historinë e sektorit të teknologjisë. Ai nuk pranoi të komentojë ndërsa po shkonte në seancë.
Tutje, Hock Tan do të prezantojë argumentet e tij tek zyrtarët e lartë të Komision Evropian, përfshirë edhe zëvendësdrejtorin e tij të përgjithshëm për bashkimet e firmave, Guillaume Loriot, dhe homologët e tyre nga agjencitë kombëtare të konkurrencës, si dhe avokatët nga ekzekutivi i BE-së, raporton Reuters, përcjell Telegrafi.
Presidenti i VMware, Sumit Dhawan paraqitjen e tij në këtë seancë do ta bëjë nga një video konferencë, ndërsa brenda seancës nuk do të ketë asnjë pjesëmarrës nga palët e treta.
Kërkesa e Broadcom për seancën dëgjimore erdhi pasi Komisioni Evropian muajin e kaluar paralajmëroi se marrëveshja mund të kufizojë konkurrencën në treg për disa komponentë harduerikë që ndërveprojnë me softuerin e VMware.
Kompania kishte shpresuar se rregullatorët do të konsideronin prezencën e Amazon, Microsoft dhe Google në tregun e kompjuterëve “cloud” si një provë e konkurrencës së fortë, thanë për Reuters disa persona në njohuri me çështjen.
Broadcom pritet të ofrojë mjete juridike në ditët në vijim pas seancës dëgjimore. Afati i BE-së për një vendim është 21 qershori, i cili do të shtyhet pasi të dorëzohen koncesionet. /Telegrafi/