Republika e Kosovës sot (17 shkurt 2021) shënon 13-vjetorin e shpalljes së pavarësisë.
Emra të njohur nga bota e sportit dhe federatat i kanë shfrytëzuar profilet e tyre në rrjetet sociale për të uruar për këtë ditë të rëndësishme në historinë e vendit tonë.
Më 17 shkurt të vitit 2008, Kuvendi i Republikës së Kosovës shpalli Deklaratën e Pavarësisë së Kosovës.
Në një mbledhje ku morën pjesë 109 nga gjithsej 120 deputetë, Kuvendi i Kosovës njëzëri shpalli Kosovën shtet të pavarur, sovran dhe demokratik.
Shpallja e Pavarësisë ishte kurorëzim i një rrugëtimi të gjatë e të vështirë për kombin shqiptar dhe qytetarët e Kosovës, të cilët për vite me radhë vuajtën pasojat e dhunës deri në gjenocid dhe spastrimit etnik nga regjimi serb. /Telegrafi/
