Përfaqësuesi i Bashkimit Evropian për Politikë të Jashtme dhe Siguri, Josep Borrell, ka thënë se e ardhmja e Ballkanit Perëndimor, përfshirë Kosovën dhe Serbinë, është evropiane.
Në këtë drejtim, siç ka shkruar ai në Twitter, “si BE ne jemi të përkushtuar t’i shoqërojmë ata në çdo hap të rrugës së tyre”.
Por për ta bërë të ardhmen evropiane një realitet për njerëzit e tyre, ka shkruar tutje Borell, “nuk duhet të ketë shmangie të dialogut të lehtësuar nga BE”, përcjell Telegrafi.
The future of the #WesternBalkans, including both Kosovo and Serbia, is European. As EU we are committed to accompany them on every step of their path. But to make the European future a reality for their people, there is no way around the EU-facilitated Dialogue.
— Josep Borrell Fontelles (@JosepBorrellF) May 27, 2020
Një deklaratë e Borrell vjen pasi presidenti i Kosovës, Hashim Thaçi ka thënë se nuk do të marr pjesë në proceset negociuese që udhëhiqen nga përfaqësuesi i posaçëm i Bashkimit Evropian (BE) në dialogun Kosovë-Serbi, Miroslav Lajçak.
“Është inkurajues çdo vullnet nga Bashkimi Evropian në këtë drejtim. Por, personalisht, nuk jam në kontakt me Lajçakun, pasi Kurti që tre muaj është në kontakt me të dhe nuk e di sa larg kanë shkuar bisedimet, Lajçak-Kurti-Borrell. Duhet të jemi të vetëdijshëm që jemi vend i pavarur dhe demokratik dhe përball kemi dy negociatorë që nuk e kanë njohur pavarësinë e Kosovës”, ka thënë ai.
Thaçi u shpreh se si president do t’i përgjigjet ftesave e samiteve që udhëhiqen nga Merkel, Macron, etj.
Ai kishte shprehur besim të plotë në lidershipin e SHBA-së, për përmbylljen e suksesshme të dialogut.
“Kam besim të plotë në lidershipin e SHBA-së, ata do ta përmbyllin suksesshëm dialogun. Pa rol udhëheqës të SHBA-së nuk ka faktor që i lëviz këto gjëra”, kishte thënë ndër të tjera presidentit i vendit, Hashim Thaçi.
Lidhur me këtë deklaratë të presidentit Thaçi kishte reaguar edhe raportuesja e Parlamentit Evropian për Kosovën, Viola von Cramon.
Von Cramon në një postim në Twitter shkroi se një lider i përgjegjshëm duhet të flasë me negociatorët ndërkombëtarë, pasi sipas saj, kjo nuk është zgjedhje personale.
“Një lider i përgjegjshëm duhet të flasë me negociatorët ndërkombëtarë, nuk është një zgjedhje personale. Miroslav Lajçak e ka dëshmuar se ai është duke punuar për negociatat e orientuara drejt rezultatit. Çfarë është më e rëndësishme për Hashim Thaçin?”, ka shkruar ajo. /Telegrafi/