Bislimi priti në takim asamblistin Muharrem Salihu – flasin për problemet e banorëve të Medvegjës

Mirjeta Hajzeraj

4 years ago

Nënkryetari i Lëvizjes Vetëvendosje, Besnik Bislimi së bashku me anëtarin e kryesisë së Lëvizjes, Glauk Konjufca, kanë pritur në takim asamblistin nga Medvegja, Muharrem Salihu.

LVV përmes një njoftimi për media bën të ditur se në takim është folur për problemet me të cilat ballafaqohen banorët e Medvegjës, e që janë si të natyrës ekonomike ashtu edhe politike, transmeton Telegrafi.

“Serbia ka ç’regjistruar një pjesë të madhe të qytetarëve shqiptarë të kësaj komune me qëllim të qartë për ta deformuar zyrtarisht strukturën demografike të kësaj komune shqiptare. Ajo po ashtu po synon t’i tjetërsojë pronat tokësore që janë mbi 50% në pronësi të shqiptarëve, dhe përmes implementimit të planeve urbanistike po pamundëson aktivitetet ekonomike dhe kulturore të shqiptarëve”, thuhet në njoftim.

LVV thekson se në takim është biseduar edhe për pikën e kalimit kufitar në Mutivodë.

“Me Salihu diskutuam mbi të gjitha këto dhe ndamë bindjen që Republika e Kosovës duhet të punojë edhe më shumë jo vetëm në dëgjimin e problemeve të shqiptarëve në atë komunë, por edhe në ngritjen e tyre në nivel ndërkombëtar. Gjithashtu u pajtuam që për të filluar një gjallërim ekonomik në atë pjesë, pikë kalimi në Mutivodë duhet të shndërrohet në pikë kufitare gjë që do t’i ndihmonte ndjeshëm prodhuesit në Medvegjë të cilët ende shfrytëzojnë rrugë të largëta për komunikim tregtarë me Republikën e Kosovës”, vijon njoftimi. /Telegrafi/