Zëvendëskryeministri Besnik Bislimi është treguar i ashpër ndaj emisarit të BE-së për dialogun Kosovë-Serbi, Miroslav Lajçak.
Bislimi në një postim në “X” ka kritikuar Lajçak për qasje jo të drejtë dhe jo neutrale sa i përket çështjes së dialogut.
E gjithë kjo erdhi pas një postimi që bëri të martën Lajçak ku shkroi se kishte një takim me përfaqësues të Konventës Kombëtare për Bashkimin Evropian (NCEU).
Bislimi ka shkruar se Lajçak nuk ka treguar që ishte NCEU e Serbisë.
“Emisari Lajçak ka postuar nga takimi i mbajtur me NCEU (National Convention on European Union in Serbia), disa orë para raportimit në PSC (Political and Security Committee) për dialogun ndërmjet Kosovës dhe Serbisë, por ka vendosur të mos përmend se bëhet fjalë për NCEU në Serbi”, ka shkruar Bislimi.
Zëvendëskryeministri ka shtuar se Lajçak nuk ka përmendur se në kuadër të delegacionit me të cilin ishte takuar ishin kryesisht përfaqësues të OJQ-ve nga Kosova, “të cilët në mënyrë aktive dhe të hapur avokojnë kundër integrimit të qytetarëve serbë në jetën ekonomike dhe sociale të Kosovës”.
“Megjithatë, delegacioni përbëhet kryesisht nga OJQ-të serbe nga Kosova, të cilat në mënyrë aktive dhe të hapur avokojnë kundër integrimit të qytetarëve serbë në jetën ekonomike dhe sociale të Kosovës. Z. Lajçak duhet të na shpjegojë nëse në narrativën e tij, OJQ-të serbe nga Kosova janë pjesë e NCEU Serbia dhe nëse NCEU Serbia bie nën ombrellën e tij. Një tjetër demonstrim i fortë i qasjes ‘të drejtë’ dhe ‘neutrale’ të zotit Lajçak ndaj palëve në procesin e normalizimit”, ka shkruar Bislimi. /Telegrafi/
2/3 However, the delegation is mainly composed of serb NGO-s from Kosova, actively and openly advocating against integration of Serb citizens in the economic & social life of Kosova.
— Besnik Bislimi (@BislimiBesnik) February 14, 2024