Pas rezultatit aspak të pritshëm nga ana e Bashkimit Europian, të votimeve gati treditore në Parlamentin britanik mbi çështjen jetike të “Brexit”-it kur kanë mbetur dy javë nga afati i përcaktuar për shkëputjen e ishullit nga blloku, ka reaguar edhe kryenegociatori i BE-së, Michel Barnier.
“Nëse Britania e Madhe dëshiron ende të largohet nga Bashkimi Europian dhe kërkon të shkëputet në një mënyrë të rregullt siç na ka thënë kryeministrja neve, atëherë ky traktat (i referohet planit të rakorduar) kështu siç është, i cili organizon shkëputjen e rregullt, ky traktat është i vetmi opsion i mundshëm dhe i disponueshëm”, është shprehur Barnier.
Tashmë “topi” është në fushën e Bashkimit Europian, teksa vendet anëtare duhet të miratojnë në unanimitet kërkesën për shtyrjen e afateve të “Brexit”-it me ishullin përtej 29 marsit, në mënyrë që të mundësohet rinegociimi i marrëveshjes, por një gjë të tillë, BE-ja duket e vendosur të mos e ofrojë.
“Nëse duam të jemi të qartë dhe të përgjegjshëm, ne duhet të përgatitemi edhe për opsionin e ashtuquajtur pa marrëveshje, sepse data e zgjedhur prej Theresa Mayt për të lënë Bashkimin Europian më 29 mars është ende në fuqi. E di edhe mundësinë e një shtyrjeje të mundshme që Britania mund të na e kërkojë, është pikërisht një nga ato që u votuan sot në Dhomën e Komunëve, por për këtë çështje nuk kam koment”, tha ai, duke lënë të nënkuptohet se nuk ekziston një opsion i dytë nga ana e BE-së.
Në fund, Michel Barnier përsërit edhe njëherë vullnetin e BE-së dhe seriozitetin e situatës, përcjell tch.
“Situata po bëhet shumë serioze dhe duhet të përgatitemi edhe për opsionin që ne nuk do të dëshironim ta konsideronim, për të cilin unë nuk kam punuar kurrë. Kjo, sepse unë kam punuar për arritjen e një marrëveshjeje. Opsioni që po përmend është dështimi i negociatave dhe një dalje pa marrëveshje, e cila do të ketë shumë pasoja”, paralajmëroi Barnier.