Mario Balotelli do të kthehet në Ligën Premier dhe kjo është e sigurt. Kështu është shprehur agjenti i tij, Mino Raiola.
Sulmuesi italian u largua nga Liverpooli për ta kaluar në Ligue 1 te Nice si lojtar i lirë. Edhe pse SuperMario ka dështuar të lë përshtypje në futbollin anglez, përfaqësuesi i tij beson se ai do të kthehet.
“Italia është e vështirë për të, për shkak të vëmendjes që merr. Nëse dëshmon se mund të bëhet i qëndrueshëm te Nice dhe të shënojë gola, atëherë imagjinoni sa i kërkuar mund të jetë për menaxherët e Ligës Premier në verën e ardhshme, si lojtar i lirë”.
“Franca ka nevojë për të, ashtu si pati nevojë për Zlatanin. Ai i bën mirë ligës (franceze), por nuk ka dyshim se do të kthehet në Ligën Premier”.
“Çfarë do të bëjë një trajner pastaj? Të grumbullojë 100 milionë funte për një sulmues ose ta marrë Balotellin? Kjo, pasi askush nuk mund të më thotë se ai nuk është talent i klasit botëror”, është shprehur Raiola për Daily Mail. /Telegrafi/