Atletët tanë kanë thyer bllokimin e vazhdueshëm të Serbisë që iu është bërë sportistëve tanë. Ata garuan të barabartë me të gjitha shtetet tjera në Kampionatin Ballkanik U-20, që të shtunën dhe të dielën u mbajt në Beograd të Serbisë – thuhet në një postim të faqes zyrtare të Komitetit Olimpik të Kosovës në Facebook.
Garuesit tanë u përfaqësuan me simbolet tona shtetërore, duke përdorur emrin Kosova në fanellat garuese dhe rekuizitat tjera sportive, kurse flamuri ishte i paraqitur ne tabelat e rezultateve.
Shkaku i Kosovës, Federata Ballkanike ka vendosur që asnjë flamur i ndonjë shteti të mos valojë në Kampionatin Ballkanik.
Përfaqësimi i atletëve tanë në një garë ndërkombëtare në Beograd, është i pari, dhe vjen pas refuzimit të vazhdueshëm të Serbisë, e cila ua kishte ndaluar sportistëve tanë pjesëmarrjen me simbole shtetërore dhe fanella me mbishkrimin Kosova. Së fundi një gjë e tillë u kishte ndodhur boksierëve, që nuk u lejuan të marrin pjesë në botërorin e mbajtur në Beograd.
Ekipi i atletëve tanë u përbë nga Florentina Restelica, Sara Susuri, Ejona Shala, Enis Bytyçi, Granit Ahmeti dhe Olti Bytyqi.
Sa i përket rezultateve, Sara Susuri në disiplinën 60m u rendit e 12-ta me rezultat 8.15. Olti Bytyqi në disiplinën 800m u plasua i shtati me rezultat 2:00.92, Ejona Shala në 1500m ishte e 9-ta me rezultat 5:16.80, Florentina Restelica në disiplinën 400m zuri vendin e dhjetë me rezultat 1:02.74, Enis Bytyqi në disiplinën 400m doli i nënti me rezultat 51.85, dhe Granit Ahmeti në disiplinën 400m u plasua i 11-ti me rezultat 53.03. Gresa Bakraqi theu rekord të Kosovës në disiplinën 800m për femra me rezultat 2:09.53.
