Ramadan Krasniqi-Dani iu bashkua trendit të disa artistëve që u kënduan qytetarëve nga vendi i tyre. Nga qyteti i Pejës, interpretimi i këngëtarit të mirënjohur është transmetuar drejtpërdrejt tek publiku, duke i argëtuar kështu të gjithë adhuruesit e muzikës së tij.
Dani kishte theksuar se gjatë 48 vitesh karrierë, nuk i kishte ndodhur të performonte pa publik, gjë e cila ndodhi për shkak të pandemisë globale.
Performancën e tij e kanë ndjekur mijëra njerëz përmes ekraneve dhe rrjeteve sociale, duke komentuar paraqitjen skenike të tij, përfshirë këtu familjarë e kolegë muzikorë.
Në mesin e tyre është edhe bashkëpunëtorja e tij, Shkurte Gashi, e cila përmes rrjetit social Instagram ka ndarë një imazh nga koncerti virtual i këngëtarit.
Violeta Kajtazi është këngëtarja tjetër që përmes një postimi vlerësoi interpretimin i cili u realizua në Pejë.
“Peja ime edhe më e bukur me zërin brilant të Danit”, ka shkruar ajo në mbishkrimin e publikimit në rrjetet sociale.
Një vlerësim të tillë e ka dhënë edhe Malësori i cili shkroi: “Na kënaqe”, në një postim që etiketonte emrin e këngëtarit dhe shoqërohej me një fotografi nga interpretimi i tij.
Ndër të tjera, Dani interpretoi pothuajse të gjitha hitet nga karriera e tij, i cili ka zgjatur rreth një ore dhe ka kënaqur publikun e gjerë. /Telegrafi/