Arsenali thuhet se ka rënë dakord për një marrëveshje huazimi me detyrim blerje për mbrojtësin spanjoll Pablo Mari nga Flamengo.
Sipas gazetës AS, Mari do të kalojë te Arsenali si huazim gjashtëmujor deri në fund të sezonit aktual përpara se transferimi të bëhet i përhershëm në verë për shifrën e detyrueshme prej 11 milionë eurosh.
Kampioni brazilian dhe ai i Amerikës së Jugut, Flamengo, kanë konfirmuar tashmë ardhjen e zëvendësimit të Mari, me Leo Pereira që iu bashkua të martën nga Athletico Paranaense.
Pablo Mari filloi karrierën e tij në Real Mallorca para se të transferohej në Gimnastic Tarragona, por në vitin 2016 ai u bashkua me Manchester Cityn, përpara se të huazohej shumë herë, derisa të bashkohej me Flamengo në një marrëveshje të përhershme verën e kaluar.
26-vjeçari kaloi sezonin e kaluar si huazim në Deportivo La Coruna, ku bëri 38 paraqitje dhe ishte pjesë e skuadrës që humbi ‘finalen’ e play-offit kundër Real Mallorca.
Ai bëri dy paraqitje si zëvendësues në La Liga për Mallorcan në sezonin 2011/12 dhe gjithashtu ka kaluar kohë edhe në Girona dhe NAC Breda. /Telegrafi/