Kryetari i Lidhjes Demokratike të Kosovës, Lumir Abdixhiku ka shprehur nevojën dhe domosdoshmërinë që ka Kosova për t’u anëtarësuar në Aleancën Veriatlantike.
Abdixhiu në Facebook ka shtuar që bashkimi i deritanishëm i NATO-s si reagim ndaj agresionit rus në Ukrainë, është një mundësi shumë e mirë edhe për Kosovën për t’i anëtarësuar në këtë aleancë.
“Bashkimi i tanishëm euroatlantik si reagim ndaj tiranisë ruse mbi Ukrainë, është një dritare historike për Kosovën. Anëtarësimi ynë në NATO sot ka një mundësi të re. Kosova, institucionet tona, diplomacia jonë, duhet të shfrytëzojnë këtë dritare historike që rrallëherë na hapet kaq shumë; e aleatët tanë ndërkombëtarë duhet të përshpejtojnē anëtarësimin tonë si proces të natyrshëm të sigurisë Evropiane. Kosova në NATO është domosdoshmëri; gjithnjë ka qenë, gjithnjë do të jetë”, shkroi ai.
Postimi i plotë i Abdixhikut
Gjermania sot rriti buxhetin për mbrojte në rekordet më të larta të shtatë dekadave të fundit; në 2% të Bruto Produktit Vendor; e 100 miliardë euro investime vetëm këtë vit. Vendet e mbetura të BE-së tani kërkojnë anëtarësim të plotë në NATO.
Doktrina “paqe nëpërmjet forcës” – e presidentit Reagan, po rikthehet me të drejtë në Evropë. Më 17 korrik të vitit 1980, në Konventën Republikane të kohës, ai thoshte: “Ne e dimë shumë mirë se lufta nuk vjen kur forcat e lirisë janë të forta, por kur ato janë të dobëta. Pikërisht atëherë tiranët tundohen.”
Putin është shembull i një tundimit të tillë. Aleatët e tij në Serbi, janë shembull të një tundimi të tillë.
Bashkimi i tanishëm euroatlantik si reagim ndaj tiranisë ruse mbi Ukrainë, është një dritare historike për Kosovën. Anëtarësimi ynë në NATO sot ka një mundësi të re. Kosova, institucionet tona, diplomacia jonë, duhet të shfrytëzojnë këtë dritare historike që rrallëherë na hapet kaq shumë; e aleatët tanë ndërkombëtarë duhet të përshpejtojnē anëtarësimin tonë si proces të natyrshëm të sigurisë Evropiane. Kosova në NATO është domosdoshmëri; gjithnjë ka qenë, gjithnjë do të jetë.
Le të shfrytëzojmë këtë moment të ri për një hap të madh historik. Le t’i nxisim të gjitha potencialet tona në këtë drejtim. /Telegrafi/
