American Express është kompania më e fundit e kartave të kreditit që njofton se i ka dhënë fund operacioneve në Rusi, derisa agresioni ushtarak në Ukrainë po përshkallëzohet.
Kompania me anë të një deklarate ka thënë se kartat e lëshuara botërisht të American Express nuk do të funksionojnë më në Rusi dhe kartat e lëshuara në Rusi nuk do të funksionojnë jashtë vendit, përcjell Telegrafi.
“Kjo është pjesë e hapave të mëparshëm që kemi ndërmarrë, të cilat përfshijnë ndërprerjen e marrëdhënieve tona me bankat në Rusi të ndikuar nga sanksionet e SHBA-së dhe qeverive të tjera ndërkombëtare”, tha American Express.
Po ashtu, gjigantët amerikanë të pagesave Visa dhe MasterCard kanë njoftuar se kanë pezulluar punën në Rusi për shkak të agresionit ushtarak të kësaj të fundit në Ukrainë.
Qeveria ukrainase u kishte bërë thirrje parë kompanive financiare që të pezullonin funksionimin e tyre në Rusi. /Telegrafi/