Telegrafi

Ajaxi udhëton në Austri, De Ligt mbetet në shtëpi për të finalizuar transferimin te Juventusi

Shkumbin Pireva

Ajaxi ka publikuar listën prej 28 futbollistëve të ftuar në fazën përgatitore para-sezonale që do ta zhvillojë në Austri, ndërsa Matthijs De Ligt është lënë në shtëpi.

Klubi i madh holandez ka udhëtuar sot (e shtunë) gjatë ditës në Bramberg të Austrisë, ku do ta kryej fazën e parë para-sezonale.

Në faqen zyrtare të klubit, Ajaxi ka konfirmuar se me vete në Austri janë ftuar plot 28 futbollistë.

Kapiteni i tyre, De Ligt është lënë në shtëpi pasi thuhet se është afër finalizimit të një transferimi.

Skuadra e re e 19-vjeçarit holandez thuhet të jetë Juventusi, të cilët u raportuan se kanë arritur marrëveshje në parim me klubin holandez.

Transferimi i De Ligt mendohet se do t’i kushtojë 70 milionë euro Juventusit, ndërsa paga e tij do të jetë mbi 10 milionë euro në sezon. /Telegrafi/