Një pilot bëri një ‘arratisje mrekullie’ pasi aeroplani i tij i vogël u rrëzua në det – duke shmangur për pak përplasjen në shtëpitë dhe shkëmbinjtë aty pranë.
Sipas mediave të huaja, përcjell Telegrafi, ngjarja e frikshme ndodhi mëngjesin e të martës në qytetin bregdetar Porthcawl, pranë Bridgend në Uellsin Jugor.
Dëshmitarët raportuan se e panë pilotin duke u përpjekur dëshpërimisht të rimarrë kontrollin e aeroplanit – përpara se të binte në det, duke u ulur me kokë poshtë.
Dhe në mënyrë të pabesueshme, piloti mashkull i mbijetoi përplasjes dhe ishte në gjendje të shpëtonte nga aeroplani që po fundosej, duke ecur në breg.
Drama u dëshmua nga Elliot Jones që kishte nxjerrë qenin e tij për ecje.
Hidrauliku 28-vjeçar tha për MailOnline: “Aeroplani ishte ulët ndërsa fluturonte mbi shtëpi. Nëse nuk do të ishte kthyer për në det, ai mund të ishte përplasur për disa shtëpi dhe të vriste disa njerëz. Ishte një mrekulli”.
Ndërkohë një zëdhënës i rojës bregdetare shtoi se personi u largua “nga aeroplani dhe u gjend në tokë të thatë”.
Më vonë ai u mor nën kujdesin e Shërbimit të Ambulancës së Uellsit.
Nuk dihet se çfarë e shkaktoi përplasjen dhe për ngjarjen është vënë në dijeni Autoriteti i Aviacionit Civil. /Telegrafi/