Kryetari i Lidhjes Demokratike të Kosovës (LDK), Lumir Abdixhiku, ka thënë se prioritet i Qeverisë duhet të jetë anëtarësimi në NATO dhe procesi i dialogut me Serbinë.
Sipas tij, procesi i dialogut është me interes nacional prandaj ashtu duhet të jetë edhe për Qeverinë.
I ftuar në “Debat Plus”, Abdixhiku, ka thënë se “kush nuk e përkrah dialogun është qyqar dhe populist”.
“Duhet që kjo Qeveri të ulet në tavolinë dhe të dialogojë, madje tani është dashur të shfrytëzojë momentumin gjeopolitik të rezolutës së NATO-së , për përparim në politikën e jashtme”, është shprehur Abdixhiku.
I pari i LDK-së, gjithashtu ka thënë që “fatalitetet e politikës së jashtme nuk i durojmë dhe as nuk i ndalim, nëse rrezikohet fati i Kosovës, për shkak të dështimit të Qeverisë”.
Ai ka shtuar, që kryeministri e ka përgjegjësinë kushtetuese për procesin e dialogut, prandaj duhet të jetë prioritet i tij, sepse ai është bartës i tij dhe duhet ta dërgojë deri në fund.
“Dialogu është i domosdoshëm, sepse është një moment historik që duhet ta shfrytëzojmë, nuk ka pasur pozicion më të mirë në këto 15 vitet e fundit, prandaj është mëkat nëse nuk shfrytëzohet”, ka shtuar ai.
Kryetari i Lidhjes Demokratike të Kosovës, Lumir Abdixhiku, ka thënë se narracioni i krijuar mbi idenë se opozita nuk po punon sa duhet, është trillim i krijuar nga kryeministri i Kosovës, Albin Kurti.
Abdixhiku ka thënë se një narracion i tillë sikurse opozita nuk po punon është krijuar nga vet Kurti dhe se LDK-ja ka aktivitet të shtuar opozitar.
“Mos bini në kurth të Albin Kurtit. Kjo qeveri është e dobët dhe nuk po jep rezultate as në politikë të brendshme e as në të jashtme”, ka thënë ai, duke shtuar se është një qeverisje e cila ka krijuar një realitet paralel të Kosovës.
Duke i kujtuar se dikur Abdixhiku kishte punuar me Kurtin, Abdixhiku ka thënë se në njëqind ditëshin e punës me të, ritmi i punës ka qenë shumë më i madh.
Abdixhiku kishte shërbyer si ministër i infrastrukturës në qeverinë e Albin Kurtit, ku në koalicion ishin Vetëvendosje dhe LDK.