Kryeministri i Malit të Zi, Dritan Abazoviq dhe ai i Shqipërisë, Edi Rama, po qëndrojnë në Ukrainë ku me ftesë të presidentit ukrainas Volodymyr Zelensky, kanë shkuar për vizitë në Kiev.
Dyshja Abazoviq-Rama para pak çastesh kanë njoftuar se kanë arritur në Ukrainë, ku kryeministri i Malit të Zi, ka shkruar në profilin e tij në Twitter se kanë shkuar për të shprehur mbështetjen për popullin ukrainas, transmeton Telegrafi.
E tani Abazoviq publikoi edhe pamjet nga kjo vizitë e shumëpërfolur, ku përveç se shoqëroheshin nga forcat elitare të Ukrainës, krah dy liderëve nga Ballkani u panë edhe njësitë elitare të Shqipërisë dhe Malit të Zi.
Abazoviqit dhe Ramës u printe një zyrtar ukrainas, që i informonte për dëmet materiale dhe ato në njerëz që ua kanë shkaktuar forcat ruse që me urdhër të Vladimir Putinit filluan agresionin më 24 shkurt dhe për asnjë moment nuk kursyen civilët.
Ndryshe Abazoviq disa ditë më parë zhvilloi një bisedë telefonike me presidentin ukrainas, të cilin e informoi se Mali i Zi i ka hapur dyert për refugjatët ukrainas.
Ndërkohë Zelensky gjatë bisedës i bëri një ftesë për vizitë në Ukrainë, ku pa kaluar dy ditë nga kjo bisedë, Abazoviq konfirmoi shkuarjen në Ukrainë.
Por rrugëtimin për atje e nisi me kryeministrin e Shqipërisë Edi Rama, i cili ishte i rrethuar nga forcat RENEA që kujdeseshin për sigurinë e tij – përpos atyre forcave të Ukrainës që i kanë pritur me të zbritur në Ukrainë. /Telegrafi/
