Një Brexit pa marrëveshje do të dërgonte në një kufij të ngurtë në ishullin e Irlandës dhe do të pengonte programet e BE-së për të garantuar paqen në këtë zonë, deklaroi sot Komisioni Evropian.
Ndërkohë që Britania e Madhe pritet të largohet nga BE-ja më 29 mars, po rritet frika se nuk do të ketë një marrëveshje tranzicioni, pasi një marrëveshje për ndarjen e negociuar mes Londrës dhe Brukselit, u bllokua javën e kaluar nga Parlamenti Britanik.
Një pikë madhore mosmarrëveshjeje është i ashtuquajturi “backstop”, që do të mundësonte mbajtjen hapur të kufirit mes Irlandës së Veriut, që do të largohet nga BE-ja si pjesë e Britanisë së Madhe, dhe Republikës së Irlandës.
BE-ja mbështet “backstop”, pasi një kufij i ri mund të risillte dhunën prej disa dekadash që përfundoi në fund të viteve 90-ta me Marrëveshjen e të Premtes së Mirë.
Por nga ana tjetër, euroskeptikët britanikë i tremben faktit se një “backstop” do e mbante Londrën shumë të varur nga BE.