Sigal Prishtina vazhdon të riorganizohet në përpjekjeve për t’iu kthyer serive të fitoreve dhe trofeve. Pasi mori tre basketbollistë, bardhekaltrit kanë arritur marrëveshje edhe me një trajner mjaft cilësor.
Prishtinasit shumë shpejt pritet të nënshkruajnë kontratë me Marco Calvanin, i cili në kryeqytetin kosovar pritet të vjen më 20 janar.
Këtë e ka konfirmuar për gazetën “Zëri” edhe drejtori gjeneral i Sigal Prishtinës, Florian Miftari.
Trajneri 53 vjeçar italian ka përvojë shumë të madhe, pasi ka drejtuar skuadra të njohura si: Virtus Roma, Basket Barcelona, Azzuro Napoli, Dinamo Sassari dhe së fundit Recanati.
Calvani do ta zëvendësojë në Prishtinë kroatin, Marko Sarin. Para pak ditësh Sigal Prishtina angazhoi tre basketbollistë të mëdhenj: yllin kosovar Urim Zenelajn, amerikanin Grant Johnson dhe kroatin Nenad Delic.
Prishtinasit synojnë që edicionin ta mbyllin me trofe si në Kosovë ashtu edhe në Ligën Ballkanike.