Milani nëpërmjet një komunikate zyrtare, ka njoftuar rinovimin e kontratës së Stefano Piolit deri në vitin 2022.
Ky i fundit do të jetë në klub edhe për dy sezonet e ardhshme, pasi ka bindur me punën e tij gjatë vitit 2020 dhe sidomos që prej rifillimit të kampionatit në muajin qershor.
“AC Milan njofton se ka arritur akordin me Stefano Piolin për zgjatjen me dy sezone të kontratës si trajner, e cila tashme do të skadojë në verën e 2022-shit”, thuhej në komunikatën e klubit kuqezi.
Official Statement: Stefano Pioli ➡️ https://t.co/lQ0C6m5kwF
Comunicato Ufficiale: Stefano Pioli ➡️ https://t.co/NoAXco8SwV#SempreMilan pic.twitter.com/ZMvfsqWNbt— AC Milan (@acmilan) July 21, 2020
Edhe administratori i deleguar i kuqezinjve Ivan Gazidis, ka folur pas rinovimit.
“Jam shumë i lumtur për këtë marrëveshje. Stefano ka treguar se është në gjendje të ofrojë atë model futbolli që ne mendojmë dhe duam për skuadrën tonë, një futboll entuziazmues, modern dhe pasionant”.
“Ky nuk është një vendim i marrë bazuar mbi fitoret e fundit, por mbi mënyrën si Pioli ka ndërtuar shpirtin e skuadrës dhe unitetin e brendshëm, mënyrën si ka përmirësuar paraqitjen individuale dhe kolektive të lojtarëve dhe mënyrën si ka bërë të tijën idenë tonë për skuadrën”, deklaroi administratori i kuqezinjve Ivan Gazidis, pas lajmit për rinovimin.
Në anën tjetër Pioli ka falënderuar të gjithë në klub, lojtarët dhe tifozët. Sipas tij Milani do të vazhdoj të rritet.
“Jam i lumtur dhe krenar për besimin që kam marrë nga Milani. Dua të falënderoj të gjithë, përfshirë edhe fansat tanë që kanë munguar në stadiume, por kemi qenë gjithmonë pranë tyre dhe solidarë me ta. Siç e kam thënë gjithmonë, e ardhmja jonë është sot”.
“Duhet të qëndrojmë të përqendruar, të bashkuar dhe si një skuadër e vërtetë. Jemi në fillim të një rrugëtimi të jashtëzakonshëm. Nëse vijojmë të punojmë kështu, do të rritemi më shumë dhe do të jemi më konkurrues”, ka thënë Pioli. /Telegrafi/