Zinedine Zidane ka thënë se Real Madridi është i uritur për më shumë pas eliminimit të Liverpoolit dhe arritjes në gjysmëfinale të Ligës së Kampionëve.
Los Blancos kaluan pjesën më të madhe të ndeshjes së dytë duke mbrojtur epërsinë e tyre në Anfield, me Thibaut Courtois që bëri disa herë pritje.
Ndeshja në Anfield u mbyll 0-0 dhe Reali kaloi tutje pas fitores në ndeshjen e parë me rezultat 3-1.
“Ne e dinim se do të vuanim dhe prisnim që Liverpooli të fillonte fuqishëm në 15 minutat e para”, ka thënë fillimisht Zidane pas ndeshjes.
“Kjo është normale. Është çerekfinale e Ligës së Kampionëve. Në fund, ne kemi kaluar dhe jemi shumë të lumtur”.
“Ne jemi të gjithë të bashkuar dhe ekipi gjithmonë paraqitet mirë dhe tregon se dëshiron më shumë”.
“Ne ende nuk kemi fituar asgjë, por jemi akoma gjallë në dy gara”.
“Do të pushojmë pak sepse kemi ende ndeshje para ndeshjes me Chelsean”, përfundoi trajneri i Realit. /Telegrafi/