Zëdhënësi i LVV-së, Arlind Manxhuka, e ka quajtur të padrejtë që Komiteti i Ministrave të Këshillit të Evropës nuk e futi në agjendën e takimit të sotëm kërkesën e Kosovës për anëtarësim.
“Sot u mor një vendim i padrejtë ndaj Kosovës, jo vetëm Qeverisë. Siç tha ministrja Gërvalla, nuk kemi lënë gur pa lëvizur, gjithnjë përbrenda kushtetutshmërisë e ligjshmërisë, për interesin e Kosovës”, ka shkruar ai.
Zëdhënësi i Vetëvendosjes tha se Kosova ofroi alternativa sipas Kushtetutës, por sipas tij ato nuk ishin në harmoni me kërkesat e Serbisë.
“Propozimet tona për ta tejkaluar këtë ngërç siç ka thënë edhe Kryeministri janë përbrenda 3 shtyllave, pra përbrenda kushtetushmërisë dhe ligjeve aktuale. E Serbia kërkon diçka përtej tyre. Ajo po e kërkon 2013 dhe 2015, jo 2022 e as 2024”.
Manxhuka nuk ka lënë pa kritikuar edhe eksponentët e opozitës që reaguan për këto zhvillime duke thënë se këta janë vet pjesë e problemit.
“Ndërkaq, këta që po zhurmojnë sot, janë të fundit që do të mund të ofronin zgjidhje, meqë vetë janë pjesë e problemit që na përcjell nga viti 2013”, ka shkruar tutje Manxhuka./Telegrafi/
