LDK-ja do të këmbëngulë që shumë shpejt të hidhet në votim Propozim-rezoluta për angazhimet e presidentit Hashim Thaçi për territorin.
Kështu tha deputeti i kësaj partie, Armend Zemaj, pasi gjatë seancës së sotme Kuvendi nuk ka proceduar me pikën e parë të rendit të ditës- që ishte votimi i propozim-rezolutës lidhur me angazhimet e Presidentit për përfshirjen e “shkëmbimit të territoreve” apo “korrigjim të kufijve” në dialogun me Serbinë, pasi kjo ishte tërhequr në mbledhjen e Kryesisë me kërkesë të LDK-së.
Zemaj tha se mos-procedimi i sotëm i rezolutës, nuk nënkupton se ajo është tërhequr.
“Rezoluta nuk është tërhequr. Rezoluta është larguar vetëm nga rendi i ditës dhe shumë shpejt, me një konkludim të përbashkët, mbi të gjitha të sponsorizuesve dhe të deputetëve nënshkrues, por edhe një dakordimi ditor, kur të gjithë deputetët e Kuvendit të Republikës të Kosovës të jenë të pranishëm gjatë kësaj faze javore, rezoluta të vijë në votim. Mbi të gjitha prapë po insistojmë për konsensus, i cili është i domosdoshëm, por duke ruajtur edhe arsyeshmërinë”, tha ai.
Ai ka shtuar se nëse është e nevojshme, kjo rezolutë do të kthehet në rendin e ditës përmes nënshkrimeve të deputetëve, raporton KP.
“Ne besojmë, do të insistojmë shumë shpejt që edhe sipas procedurave që i ka Kuvendi i Kosovës, por nëse është e nevojshme, do të insistojmë edhe përmes nënshkrimeve të deputetëve, që kjo të vihet pikë, mbi të gjitha po synojmë, e përbashkët, dhe për hir të interesit të përgjithshëm të Republikës të Kosovës”, u shpreh ai.