Deputeti i Lidhjes Demokratike të Kosovës, Armend Zemaj ka thënë se edhe pas një dekade nga shpallja e pavarësisë, në Kosovë vazhdon të mbetet problem luftimi i krimit të organizuar dhe korrupsionit.
Zemaj para deputetëve në seancën e Kuvendit të Kosovës, ka thënë se krimi i organizuar dhe korrupsioni janë dhe mbeten kërcënim për zhvillimin e shtetit të Kosovës.
“Lufta kundër korrupsionit ndaj profilit të lartë dhe konfiskimi efektiv i pasurisë së pashpjegueshme mbetet akoma kriter i pa përmbushur me prioritet të lartë. Kosova vazhdon të demonstrojë rezultate të dobëta në luftën kundër korrupsionit, në veçanti në rastet që ndërlidhen me profilin e lartë”, u shpreh Zemaj.
Ai shtoi se luftimi i korrupsionit në Kosovë mbetet një prej detyrave kryesore të institucioneve përkatëse.
Zemaj fajtor për këtë gjendje ka bërë Qeverinë Haradinaj, duke theksuar se kjo qeveri mbanë rekord të zi në këtë drejtim.
“Qeveria Haradinaj në koalicion me Kadrin dhe Hashimin mbanë rekord te zi duke marrë parasysh se ka numrin më të madh të njerëzve më të kaluar kriminale dhe me aktakuza nga prokuroria speciale”, tha Zemaj. /Telegrafi/