Zemaj me mesazh para vitit të ri shkollor: T’i përmbahemi rekomandimeve dhe ta mposhtim virusin

Kemajl Berisha

4 years ago

Ministri i Shëndetësisë Armend Zemaj ka përzgjedhur shkollën “Lidhja e Prizrenit” në Deçan për të përçuar mesazhin te prindërit, mësimdhënësit dhe nxënësit para fillimit të vitit të ri shkollor nesër në Kosovë.

Ai me këtë rast ka përkujtuar rëndësinë e madhe që ka përmbajtja e rekomandimeve të institucioneve shëndetësore për parandalimin e koronavirusit në mjediset shkollore, në mënyrë që procesi mësimor të mos ndërpritet.

“Nesër është ditë shumë e rëndësishme për më të dashurit tanë, nxënësit. Po fillon Viti i ri shkollor. Nga këtu, nga shkolla “Lidhja e Prizrenit” në Deçan, ku unë fillova ditën e parë të shkollës, kërkoj nga Ju, ta shtoni kujdesin për nxënësit, fëmijët tuaj edhe në këtë fazë të ndjeshme. Ju lus që t’i inkurajoni ata për kujdes të shtuar gjatë shkuarjes dhe ardhjes nga shkolla dhe vazhdimisht, të respektojnë rregullat për pengimin dhe luftimin e pandemisë”, tha Zemaj.

Ai bëri të ditur se respektimi i këtyre rregullave, do të sjell vit të suksesit edhe në mësim- nxënie.

“COVID-19 tashmë është mes nesh, duhet të kemi kujdes, duke iu përmbajtur rekomandimeve, ne duhet të vazhdojmë me sukses mësimin në shkolla, të fitojmë edhe betejën kundër virusit e gjithsesi edhe betejën për dije.”

“Mësimdhënës të çmuar, prindër dhe nxënës të dashur, urime fillimi i Vitit të ri shkollor! Bashkë mund t’ia dalim! Vendose maskën! Mbaje higjienën! Ruaje distancën”, ka shkruar Zemaj, njofton Telegrafi.