Deputeti i Lidhjes Demokratike të Kosovës, Armend Zemaj, ka kritikuar Qeverinë e udhëhequr nga kryeministri Albin Kurti për qasjen në sektorin e shëndetësisë.
Në një postim të bërë në Facebook të premten, ai ka thënë se ekzekutivi ka dështuar dhe e ka degraduar shëndetësinë.
“Qasja në sektorin e shëndetësisë nuk ndryshon. Ndaj, dështimi e degradimi vazhdon. Interesimi i kësaj qeverie nuk është menaxhimi e as avancimi i shërbimeve shëndetësore, këtë e kemi thënë që nga fillimi”, ka shkruar Zemaj.
Ai tutje ka thënë se interesimi kryesor i kësaj qeverie mbetet “kapja e pozitave nga militantë politikë”.
“Filluan me Bordin e SHSKUK, menaxhmentin, bordet profesionale e tashmë kanë arritur interesin primar e që del të jetë i madh “prokurimin e tenderët një burimor”, dmth pasurimin e jo ruajtjen e shëndetit publik!”.
Deputeti opozitar ka përmendur edhe largimin e mjekëve nga vendi, duke pohuar se vetëm për katër muaj të këtij viti kanë ikur 104.
“Ndërsa, mjekët largohem çdo ditë, qindra mjekë dhe infermierë po ikin; vetëm për katër muaj të këtij viti, 104 kanë ikur. Zoti i ruajt mjekët e infermierët e mbetur në vend si dhe pacientët që kanë nevojë për shërim!”, ka përfunduar Zemaj./Telegrafi/
