Zemaj: Këtë stinë Kosova duket e zbrazur pa qindra e mijëra mërgimtarët tanë

Mirjeta Hajzeraj

4 years ago

Ministri i Shëndetësisë, Armend Zemaj ka thënë se në stinën e verës Kosova po duket e zbrazur pa mërgimtarët.

Zemaj ka thënë së mërgimtarët nuk po vijnë sepse nëse rikthehen në shtetet ku jetojnë janë të detyruar të rrinë në karantinë, transmeton Telegrafi.

“Virusi po na pengon neve dhe mërgatën. Këtë stinë Kosova duket e zbrazur pa qindra e mijëra mërgimtarët tanë. Këta s’po vijnë, sepse nëse rikthehen andej në shtetet ku jetojnë janë të detyruar të rrinë në karantinë”, ka shkruar Zemaj në Facebook.

Më tej, ai ka thënë se po luftojnë me të gjitha mënyrat dhe potencialin.

“Jemi duke ndjekur praktikat mjekësore e shkencore sikurse shtetet e zhvilluara. Kemi angazhuar një armatë të tërë njerëzish e profesionistësh në luftë kundër Covid19.

Qeveria e Kosovës, i tërë stafi i Ministrisë së Shëndetësisë, qindra mjekë e infermierë në tërë Kosovën që tashmë si përforcim janë dhe 100 mjekë të rijnë, 62 infermierë, 8 laborantë, 6 punonjës staf teknik dhe mbështetës që janë angazhuar rishtas në shërbimet shëndetësore spitalore së fundi të riorganizuara, “Bordi Këshillëdhënës për Luftën Kundër Covid19” me prof. Dr. Lul Rakën kryesues, “Instituti Kombëtar i Shëndetësisë Publike”/ IKShPK drejtuar nga prof. Dr. Naser Ramadani, SHSKUK drejtuar nga u.d. dr. Valbon Krasniqi, dhjetëra inspektoret sanitare të AVUK-ut dhe inspektoratet komunale e inspektoratet e tjera përkatëse, autoritetet komunale, policia (me rreth 4000 pjesëtarë të angazhuar enkas në luftën kundër Covid19), stafi nga Qendra Operative Emergjente, sikurse një sërë mekanizmash të tjerë shtetërore, po e bëjmë të pamundurën që ta mposhtim këtë të keqe që po na rëndon çdo ditë jetën”, thotë ai.

Më tej ai ka thënë se janë në proces të licencimit të laboratorëve që do të realizojnë testime për COVID-19, për qytetarët.

“Virusi na ka detyruar ta braktisim normalitetin e përditshëm. Na është imponuar normaliteti i ri, ku detyrimisht duhet të përshtatemi e të mësohemi, që secili nga ne të vendosim maska, të ruajmë distancimin social, të mbajmë higjienën duke shpërlarë e dezinfektuar duart vazhdimisht.Na ka izoluar dhe s’mund të lëvizim lirshëm nëpër kufijtë”, pohoi ai.

Ministri thotë se COVID-19, nuk e kursen askënd.

“Asnjëri nga ne nuk jemi imun ndaj tij.Ne si individë, e si shoqëri, maksimalisht duhet të jemi të përgjegjshëm. Nëse nuk mbrohemi duke zbatuar rregullat antivirus kjo dergjë do të zgjas edhe më tej. Mbajtja e maskës nuk është sakrificë. Është heroizëm.E shpëton veten, familjen dhe të tjerët.Juve që s’mbani maska, përveç se mund të infektoheni, njashtu nxitni papërgjegjshmëri edhe tek të tjetër.Përkujdesuni për veten dhe të dashurit tuaj”.

Zemaj ka kërkuar nga qytetarët që të respektojnë rregullat anti COVID-19. /Telegrafi/