Deputeti i “Nisma për Kosovën”, Milaim Zeka ka theksuar se varrezat e familjes Jashari janë ndërtuar nga një turk. Ai në foltoren e Kuvendit ka thënë se në kohën kur pati theksuar se janë vjedhur para edhe në varrin e Adem Jasharit, nuk ka qenë krejt e kotë.
“Kur kam thënë se janë vjedhur pare edhe në varr të Adem Jasharit, unë e kam ditur çka po flas”, ka theksuar Zeka.
“Varrezat në Prekaz nuk janë bërë nga buxheti i Qeverisë, ato janë rregulluar nga një turk me para nga xhepi i vet”, ka thënë Zeka në foltoren e Parlamentit të Kosovës.
Për çështjen e kompleksit memorial të familjes Jashari, kanë folur edhe deputeti i Partisë Demokratike të Kosovës (PDK), Bekim Haxhiu – Kamishi dhe deputeti i Aleancës për Ardhmërinë e Kosovës (AAK), Daut Haradinaj.
Haxhiu ka thënë se amendamenti i miratuar në Kuvend, do duhej t’i hapte rrugë konservimit dhe restaurimit të shtëpive muze në lagjen Jasharaj në Prekaz, por sipas tij, Agjencioni për mbrojtjen e Komplekseve Memoriale nuk bëri punën e duhur.
“Përkundër ndarjes së mjeteve financiare, kodit buxhetor për restaurimin dhe konservimin e shtëpive muze, puna nuk ka filluar as atëherë, as sot, e për më keq mjetet e planifikuara nuk u shpenzuan, ato u ridestinuan e disa nga to shkuan edhe në suficit”, tha ai.
Duat Haradinaj ka theksuar se nëse nuk merren masa, atëherë kullat e Jasharajve do të shembet.
Sipas tij, në legjislaturën e mëparshme, ka kaluar Ligji për Kompleksin Memorail Adem Jashari, pastaj ka rënë Kuvendi dhe ky ligj është kthyer në pikën zero.
“Ka dy javë që kemi kërkuar që ky ligj të procedohet dhe të amendamentohet sa më shpejt dhe ta merr drejtimin e duhur dhe të zgjidhet sa më shpejt ky problem. Edhe një fakt, nuk po dua të hyj në detaje por është e vërtetë që ka pasur fonde të ndara për kompleksin memorial tash e sa vite. Ka pasur një projekt nga një arkitekt Perparim Rama, e që ka mbetur në sirtar e që nuk dihet ku ka mbetur”, theksoi Haradinaj”, ka shtuar Haradinaj. /Telegrafi/