Gjatë ditës së djeshme në Spanjë qarkulluan lajmet se Barcelona kishte refuzuar një ofertë 100 milionë euro për Ansu Fatin.
Barcelona është duke kaluar nëpër një krizë të madhe financiare, por përkundër kësaj ka refuzuar largimin e xhevahirit të saj.
17-vjeçari ka zhvilluar 24 ndeshje në të gjitha garat me ekipin e parë të Barcelonës, ku ka realizuar pesë gola dhe ka bërë një asistim.
E përditshmja katalunase Sport tanimë ka zbuluar edhe emrin e skuadrës që ka bërë këtë ofertë për Fatin.
Ka qenë gjiganti anglez Manchester United që ka ofruar 100 milionë euro për transferimin e tij, ofertë që është hedhur poshtë menjëherë nga katalunasit.
Barcelona i ka bërë të qartë drejtuesve të gjigantit anglez se Fati mund të largohet vetëm nëse paguhet klauzola e tij prej 170 milionë eurove.
Por kjo klauzolë e tij do të rritet edhe më shumë, pasi në momentin që Fati bëhet nga edicioni i ri lojtar i padiskutueshëm i ekipit të parë, atëherë automatikisht do të ketë klauzolë largimi prej 400 milionë euro.
Përkundër vështirësive të mëdha financiare, Barcelona do të vazhdoj të mbajë në radhët e veta Fatin pasi shihet si e ardhmja e klubit katalunas.
Vlen të theksohet se për të interesim ka shprehur edhe gjiganti gjerman Borussia Dortmund. /Telegrafi/