Që kur filloi pushtimin e Ukrainës, presidenti rus, Vladimir Putin është ruajtur më shumë dhe udhëtimet i ka të kufizuara brenda dhe jashtë vendit.
Ai rrallëherë po e shfrytëzon aeroplanin dhe më shpesh po shihet duke udhëtuar me tren të blinduar. Madje, treni shkon deri tek vilat madhështore në periferi. Drejt tre pallateve të Putinit të vendosura në Socchi, Novi Ogaryovo dhe Valdai, u ndërtua fshehurazi një hekurudhë në mënyrë që ai të mund të zbriste menjëherë nga treni drejt destinacionit të tij.
Nga jashtë, treni duket si shumica e trenave të tjerë të pasagjerëve rusë, por sa herë që niset, ndryshon të gjitha oraret sepse ka përparësi absolute.
Brenda është e dekoruar në mënyrë luksoze, e mbrojtur nga përgjimet, ka sallën e mbledhjeve, zyrën, dhomën e gjumit, bar, aparaturat mjekësore dhe një sërë objektesh sikur të ishte një qendër relaksuese.
Portali kërkimor Dossier Center, i cili financohet nga manjati rus në mërgim, Mikhail Khodorkovsky, dikur njeriu më i pasur në Rusi, dhe tani një nga disidentët e shquar dhe kritik i madh i presidentit rus, zbulon se treni luksoz i Putinit madje ka një hamam – një banjë turke me avull, dhomë bukurie si dhe një palestër.
Nëse është e nevojshme, dhoma e bukurisë kthehet në një dhomë mjekësore, sepse ka pajisje të plota për shpëtimin e jetës: nga respiratorë te defibrilatorë.
Dossier Center thekson se treni ka edhe një aparat Space B. Brown që lejon matjen e dhënien e dozës së saktë të barit dhe një monitor Infinity M540 që monitoron pulsin, presionin, temperaturën dhe parametrat e tjerë gjatë anestezisë… Telefonat dhe shërbimet e internetit janë plotësisht të mbrojtura nga çdo përgjim me pajisje speciale enkriptimi.
Treni i blinduar i kushtoi buxhetit rus të paktën 6.8 miliardë rubla, që është rreth 70 milionë euro. Këtë e ka zbuluar Dossier Center, e cila në bashkëpunim me CNN dhe median gjermane Süddeutsche Zeitung, WDR dhe NDR, ka marrë mijëra dokumente dhe fatura nga kompania Cirkon Service, e cila i shërben trenit të blinduar. Aktualisht Cirkon po ndërton një vagon me qendër multimediale dhe një vagon për sport dhe rekreacion.
Televizorët në tren fillimisht ishin një problem, thuhet në raport. Sinjali humbiste gjatë kalimit nëpër tunele ose nën ura. Për ta rregulluar këtë, u krijua një sistem i veçantë që kap sinjalin përpara se të transmetohet në ekran, në mënyrë që Putini të mund ta shikoj pa problem televizionin.
Missed it yesterday, but Khodorkovsky's media organ did an expose on Putin's armored train. https://t.co/UK9daynAx9
Nothing very damning, $75M is a modest sum by these people's standards; the style, furnishings and rooms are about what I'd do if I adopted the Snowpiercer lyfe. pic.twitter.com/CwE9uJkpKn
— Anatoly Karlin 🧬⏩ (@powerfultakes) July 6, 2023
Në palestër, tregon Dossier, nuk ka pajisje të rënda, por ka ulëse për ushtrimet e barkut, aparate për hiperekstension, pesha… Kujdes të veçantë sigurimi presidencial i ka kushtuar edhe aparaturave për ushtrimin e muskujve të kofshës.
Për të plotësuar nevojat e personelit të sigurisë, si dhe zyrtarëve të mundshëm të Kremlinit dhe mysafirëve privatë, treni ka gjithsej 22 vagonë, por jo të gjitha përdoren zakonisht në të njëjtën kohë. Zakonisht dhjetë vagonë lidhen me një udhëtim.
Kur Putin është në Moskë, treni zakonisht ndalet në një zonë të mbrojtur të stacionit hekurudhor Kalanchivskaya në qendër të kryeqytetit. Është një lloj platforme VIP e rrethuar me tela me gjemba dhe e monitoruar nga kamerat e sigurisë. /Telegrafi/
