Anija e përmbytur në fillim të shekullit XVI u zbulua rastësisht në Holandë gjatë një operacioni për të gjetur kontejnerët e humbur në janar në Detin e Veriut, njoftoi të mërkurën Ministria e Arsimit, Kulturës dhe Shkencës.
“Kjo është anija më e vjetër e zbuluar ndonjëherë në ujërat holandeze”, theksoi Ministria në një komunikatë. “Gjatë kërkimeve në ujërat e Detit të Veriut, u zbuluan pllaka prej bakri dhe trarë prej druri, që solli menjëherë hapjen e një hetimi arkeologjik. Hulumtuesit dolën në përfundimin që trarët vinin nga një anije që skafin e kishte të harkuar me shumë mundësi 30 metra e gjatë dhe që transportonte pllaka prej bakri”.
Sipas studiuesve druri është prerë në vitin 1536, ndërsa anija është ndërtuar rreth vitit 1540 në territorin e Holandës së sotme, që në atë kohë ishte pjesë e Perandorisë së Shenjtë Romake. Pllakat e bakrit janë të datuara me të njëjtën periudhë. /ata/