Prokuroria e Posaçme SPAK ka kërkuar masën e sigurisë me “arrest shtëpie” me mbikëqyrje policore për ish-kryeministrin Sali Berisha gjatë seancës së sotme në Gjykatën e Posaçme GJKKO.
Sipas burimeve për Euronews Albania, bëhet me dije se sipas kërkesës së SPAK, Berisha duhet të mbikëqyret 24 orë nga forca të policisë që do të qëndrojnë pranë banesës së tij.
Kujtojmë se seanca e mbajtur ditën e sotme në GJKKO për caktimin e masës së sigurisë ndaj ish kryeministrit Berisha u shty për ditën e nesërme në orën 11:00.
Sipas informacioneve, avokatët e tij, Genc Gjokutaj dhe Sokol Mëngjesi kanë kërkuar më shumë kohë për tu njohur me parashtrimet. Gjithashtu ata kanë kërkuar dhe përjashtimin e gjyqtares Irena Gjoka.
“Avokatët kanë kërkuar që të njihen me parashtrimet që Prokuroria e Posaçme ka dorëzuar në Gjykatë, krahas atyre në Këshillin e Rregulloreve për imunitetin dhe mandatin. Ata gjithashtu kanë kërkuar përjashtimin e gjyqtares Irena Gjoka nga kjo çështje.
Për të vetë personi Sali Berisha është shprehur se ajo është në konflikt interesi pasi ajo është shkarkuar nga detyra në kohën kur Sali Berisha mbante detyrën e Presidentit të Republikës së Shqipërisë e njëkohësisht edhe detyrën e kryetarit të Këshillit të lartë të drejtësisë. Nga ana tjetër pritet që një gjyqtar tjetër të shqyrtojë gjatë kësaj periudhe kohë këtë kërkesë”, tha gazetari Eni Ferhati. /Telegrafi/