Javier Zanetti ka zbuluar lojtarin më të mirë me të cilin ka punuar ndonjëherë te Interi duke thënë se ai nuk ishte Fenomeni Ronaldo, por Roberto Baggio.
Legjenda e Nerazzurrëve dhe Argjentinës u intervistua nga ish-bashkëlojtari Esteban Cambiasso në Instagram Live, ku zgjodhi bashkëlojtarin më të mirë.
Argjentinasi befasoi me zgjedhjen e tij, duke zgjedhur italianin Baggio, edhe pse gjatë karrierës ka luajtur me emra tjerë të mëdhenj.
“Kur Ronaldo arriti nga Barcelona, ai ishte thjesht i jashtëzakonshëm, por nëse do të thosha një emër, do të ishte Roberto Baggio. Ai kishte ekuilibrin ideal midis cilësisë dhe pasionit”.
“Kam një admirim të madh për Baggion, ashtu si të gjithë kanë bërë gjithmonë”, ka thënë Zanetti.
‘Bishtaleci magjik’ kishte veshur fanellën e Interit nga 1998 deri në 2000, para se të përfundonte karrierën e tij në Brescia. /Telegrafi/
