Analisti Visar Ymeri, ka thënë se kryeministri i Kosovës, Albin Kurti, po mundohet që procesin e dialogut ta arrijë me disa fitore të tjera të vogla duke përfshirë zbatimin e vendimit të Qeverisë së Kosovës për çështjen e targave.
Analisti Visar Ymeri, ka thënë se kryeministri i Kosovës, Albin Kurti, po mundohet që procesin e dialogut ta arrijë me disa fitore të tjera të vogla.
Sipas tij, njëra nga këto fitore të vogla është edhe zbatimi i vendimit të Qeverisë së Kosovës për çështjen e targave i cili do të bëhet në tri faza, që fillimisht parashihen vërejtjet, ndërsa pas tri javëve edhe gjoba për ata që nuk e zbatojnë kërkesën.
“Po të ishte një afat deri në gjashtë muaj, nënkuptohet si afat kur mundet optimalisht procesi i dialogut, por nuk mund të përfundojë. Kryeministri Kurti po mundohet që procesin e dialogut ta arrijë me disa fitore të tjera të vogla dhe njëra nga to do të ishte zbatimi i plotë i marrëveshjes për targat. Nuk mendoj se atij i duhen fitoret e vogla kur e ka mundësinë për fitore të madhe. Nuk ka nevojë të kërkojë për këto fitore të vogla”, ka thënë Ymeri në RTV Dukagjini.
Ai ka theksuar se çdo gjë që ndërmerr tani e tutje Qeveria, sipas tij ka lidhje në procesin e dialogut.
“Çdo gjë që bëjmë tash e tutje në këtë raport ka vetëm lidhje në procesin e dialogut në përgjithësi. Nuk ka më hapësirë që të merremi me targat dhe këto marrëveshje, nivelin e zbatimit të tyre sepse kemi hyrë në një fazë përfundimtare të procesit të dialogut”, shtoi Ymeri.
Ndryshe, duke filluar nga një nëntori e deri më 21 nëntor masa do të jetë ajo e qortimit, pastaj nga 21 nëntori për dy muaj, deri më 21 janar, do të jetë masa e gjobitjes.
Nga 21 janari do të ketë targa provuese për dy muaj të tjera, pas të cilës datë më 21 prill nuk mund të ketë më targa ilegale në qarkullim.
