Mesfushori i Real Madridit, Dani Ceballos, i është kundërpërgjigjur Diego Simeones pas kritikave që ky i fundit pati në drejtim të klubit madrilen së fundmi.
Simeone e pati cak Real Madridin pas fitores së tyre në mesjavë ndaj Celta Vigos në Copa Del Rey.
Kalimi i Real Madridit në çerekfinale të këtij kompeticioni erdhi përmes një goli të diskutueshëm ndaj Celta Vigos dhe Simeone tashmë kishte ndezur flakën e konspiracionit.
Tekniku argjentinas bëri me dije se vendimet që favorizojnë Real Madridin kanë ndodhur për ‘qindra vite’ dhe tashmë Ceballos i është përgjigjur kësaj deklarate.
Reprezentuesi spanjoll pati si pikë reference dy finalet e Ligës së Kampionëve që Atletico Madridi i humbi ndaj rivalit lokal gjatë drejtimit të tij, diçka për të cilën Ceballos beson se është ende në mendjen e Simeones.
“Ai ende nuk i ka harruar dy finalet që i ka humbur ndaj Real Madridit”, ka thënë Ceballos pas fitores ndaj Las Palmas.
Përndryshe, Ceballos e nisi nga minuta e parë në fitoren me rezultat 4-1 ndaj Las Palmas dhe ishte një prej lojtarëve më të dalluar në fushë./Telegrafi/