Barcelona ka qenë e njohur për kërkimin e futbollistëve në tregun e Amerikës së Jugut dhe tani me drejtorin e ri sportiv Deco, këto përpjekje pritet të rriten në vitet e ardhshme.
Vitor Roque do të bëhet pjesë e Barçës në vitin 2024, megjithëse financat e klubit do të përcaktojnë nëse ai do të jetë në skuadrën e Xavi Hernandez për gjysmën e dytë të sezonit 2023-24, apo fillimin e sezonit 2024-25.
Një tjetër adoleshent brazilian shpreson të bashkohet me Roquen në Barcelonë në vitet e ardhshme, dhe ai është Estevao “Messinho” Willian. 16-vjeçari konsiderohet si një nga talentet më të mirë në Amerikën e Jugut dhe siç ka treguar në një intervistë për Mundo Deportivo, ëndërron t’i bashkohet gjigantit katalanas.
“Ëndrra ime më e madhe është të luaj për Barcelonën, e cila është një nga klubet më të mira në botë. Unë kam lindur duke parë Neymar, Messi dhe Suarez duke luajtur te Barcelona dhe kjo është ëndrra që kam”.
“Isha shumë i lumtur kur dëgjova se Vitor Roque po shkonte në Barcelonë. Ai është një djalë me të cilin shkoj shumë mirë, jemi miq. Ne kemi luajtur tashmë së bashku. Isha shumë i lumtur për të. Kush e di nëse një ditë do të arrijmë të luajmë së bashku te Barcelona”, përfundoi talenti 16-vjeçar.
Estevao nuk do të ishte në gjendje të bashkohet me Barcelonën të paktën deri në verën e vitit 2025 , diçka që mund të jetë një gjë e mirë për sa i përket grumbullimit të parave për të arritur marrëveshje me Palmeiras./Telegrafi/