Telegrafi

Yee: Uashingtoni i shqetësuar rreth procesit të transformimit të FSK-së me ligj

Ministri i FSK-së, Haki Demolli, priti të mërkurën në takim zëvendës ndihmësin e sekretarit amerikan të Shtetit për çështje evropiane dhe euro aziatike, Hoyt Brian Yee, të cilin e falënderoi për ndihmën që SHBA po japin për FSK-në dhe vlerësoi lart bashkëpunimin e dy shteteve dhe në veçanti Partneritetin e Bashkëpunimit me Gardën Kombëtare të Ajovës.

Sipas një njoftimi, ministri Demolli e njoftoi Yee edhe me bashkëpunimin rajonal dhe atë ndërkombëtar, pjesëmarrjen e FSK-së në shumë trajnime me karakter rajonal, si dhe sukseset e arritura në garat ndërkombëtare.

Ai, po ashtu foli edhe për bashkëpunimin me DIRI-in në procesin e planifikimit të transformimit të FSK-së, si edhe me ecurinë e zhvillimit të procedurave për projektligjin për zgjerimin e misionit të FSK-së.

Nga ana e tij, sipas njoftimit, zëvendës ndihmësi i Sekretarit Amerikan të shtetit për Çështje evropiane dhe euro aziatike, Hoyt Yee, falënderoi ministrin Demolli për pritjen dhe përcolli mesazhin se Uashingtoni zyrtar është i shqetësuar rreth procesit të transformimit të FSK-së me ligj. /Telegrafi/