Lamine Yamal është sensacioni i këtij fillim sezoni te Barcelona në La Liga.
Sulmuesi i talentuar ka dhuruar një tjetër paraqitje fantastike në fitoren e katalunasve 3-4 në udhëtim te Villarreali.
16-vjeçari u zgjodh futbollist i ndeshjes pasi asistoi tek goli i parë dhe ishte kyç me gjuajtjen e tij në golin e fundit të realizuar nga Lewandowski.
Megjithatë trajneri i Barcelonës, Xavi Hernandez e ka pranuar se Yamal ka vështirësi në aspektin defensivë, por e ka quajtur gjë normale për një adoleshent 16 vjeçar.
“Lamine Yamal ka vështirësi kur mbrohet, por kjo është normale. Ai është vetëm 16 vjeç dhe ajo që na jep në sulm e mbulon atë”, tha Xavi pas fitores ndaj Villarreal.
Tutje trajneri katalunas ka thënë se kanë pritje të mëdha për sulmuesin e talentuar dhe ai po luan nga minuta e parë jo për teket e tij, por për shkak se e meriton.
“Pritjet janë shumë të larta sepse kjo është ajo që shihni. Ai nuk është titullar për shkak të tekave të trajnerit, por për shkak të asaj që bën”.
“Vendimmarrja e tij është pothuajse gjithmonë më e mira dhe shpesh më e mira. Kjo është gjëja më e vështirë në futbolli.Ai është i jashtëzakonshëm”, deklaroi Xavi. /Telegrafi/