X, kompania nën pronësinë e Musk, ka paditur shtetin e Kalifornisë mbi AB 587, një projektligj shtetëror i cili platformave të rrjeteve sociale u kërkon që të raportojnë tek Prokurori i Përgjithshëm i shtetit, çdo gjashtë muaj, se si po trajtojnë moderimin e disa kategorive të të shkruarit.
Ankesa pretendon se ligji shkel ligjet federale dhe shtetërore të fjalës së lirë, sepse “detyron kompanitë si X të angazhohen në fjalime kundër vullnetit të tyre”, pasi ato janë të detyruara të vendosin përkufizime për çështjet “e ngarkuara politikisht” si gjuha e urrejtjes apo racizmi.
Tutje kjo ankesë e X shpjegon se është “e vështirë të përcaktosh në mënyrë të besueshme” gjuhën e urrejtjes, dezinformimin, ndërhyrjen politike dhe kategoritë e tjera të përmbajtjes, raporton The Verge, përcjell Telegrafi.
Ajo shton se përcaktimi i tyre “shpesh është i mbushur me paragjykim politik” për shkak se nuk ka asnjë konsensus të pranueshëm brenda sferës publike në lidhje me domethënien e termit. X thotë se në përcaktimin e këtyre gjërave, është e detyruar të marrë një pozicion për to.
Padija pretendon se AB 587 ka për qëllim që t’i detyrojë kompanitë e rrjeteve sociale që të “eliminojë përmbajtje të caktuar të mbrojtur nga kushtetuta” për të cilën shteti mendon se është “problematike”. Zyra e guvernatorit Gavin Newsom e promovoi projektligjin si një masë “transparencë e rrjeteve sociale udhëheqëse në vend” në momentin kur ai e nënshkroi atë si ligj në shtatorin e vitit të kaluar.
Ligjet që specifikojnë se si kompanitë e mediave sociale e trajtojnë moderimin janë krijuar si në Teksas ashtu edhe në Florida dhe ato ligje presin që Gjykata e Lartë të mbajë seancat dëgjimore nga palët sfiduese ndaj tyre. /Telegrafi/