Një mbështetës i ri i ideologjisë së epërsisë së bardhë mbi popullatën e me ngjyrë, u dënua sot me burgim të përjetshëm pa mundësinë e lirimit me kusht për vrasjen e dhjetë afrikano-amerikanëve në vitin 2022 në Buffalo, në shtetin perëndimor të Nju Jorkut.
Payton Gendron, 19 vjeç, u deklarua fajtor në një total prej 15 akuzash, duke përfshirë vrasjen dhe terrorizmin dhe të shtënat masive të 14 majit në Buffalo, transmeton Telegrafi.
Pasi disa të afërm të të vrarëve folën për sulmin, Gendron u kërkoi falje familjeve të viktimave, duke thënë se tani nuk mund ta besojë atë që bëri dhe shpreson se krimi i tij nuk do t’i motivojë të tjerët të ndjekin shembullin e tij.
Ky është një nga sulmet më vdekjeprurëse të kryera në vitet e fundit në Shtetet e Bashkuara.
“Më vjen shumë keq për gjithë dhimbjen që u kam shkaktuar viktimave dhe familjeve”, tha Gendron.
“Nuk mund të shpreh se sa shumë pendohem për të gjitha vendimet që çuan në aksionet e 14 majit. Unë bëra një gjë të tmerrshme atë ditë. Qëllova dhe vrava njerëz sepse ishin të zinj”, shtoi ai.
Pak momente para verdiktit, një familjar i njërit prej të vrarëve tentoi ta sulmojë Gendronin, por policia ka parandaloi incidentin.
Gendron transmetoi drejtpërdrejt video të sulmit në platformën e transmetimit Twitch, pasi postoi tekst racist në internet duke detajuar frymëzimin e tij për vrasje të tjera masive me motive racore, thanë autoritetet.
Gendron është personi i parë në Nju Jork i dënuar për terrorizëm të “brendshëm me motive të urrejtjes racore”. E familjarët e disa prej viktimave thanë sot se duan që Gendron të dënohet me burgim të përjetshëm.
“Nuk dua të dënohet me vdekje”, tha Wayne Jones, djali i vetëm i Celestine Chaney që u vra pikërisht nga Gendroni. /Telegrafi/
