Për shkak të vonesave të fluturimeve dhe guzhmës së madhe në Aeroportin Ndërkombëtar “Adem Jashari”, mes pasagjerëve dhe agjencioneve për fluturime janë shkaktuar acarime të shumta.
Frekuentimi masiv në aeroportin e Prishtinës në këtë kohë ndodh edhe për shkak të sezonit festiv, kohë kur bashkatdhetarët nga diaspora vizitojnë Kosovën gjatë festës së Vitit të Ri.
Sipas reporterit të KosovaPressit i cili ka qenë në vendin e ngjarjes, shumë pasagjerë janë ankuar se janë detyruar të paguajnë bileta për të dytën herë për t’u kthyer në vendet tyre të punës. Në mesin e pasagjerëve ka edhe shtetas zviceranë.
E kontaktuar nga KosovaPress, zëdhënësja e Aeroportit Ndërkombëtar “Adem Jashari”, Valentina Gara, tha se vonesa në fluturime ka vetëm në një linjë fluturimi.
“Është vonesë normale, në ora 17:40 është dashur të niset, ndërsa fluturimi po realizohet në ora 19:40. Vonesa prej dy orëve është shkaktuar nga kompania përkatëse ajrore”, tha ajo.
Gara theksoi se fluturimet tjera po realizohen në orarin e paraparë pasi nuk ka mjegull sikur ditëve të kaluara.
Në një video që ka siguruar KosovaPress, shihet se si disa pasagjerë të tensionuar nga pritjet e gjata fjalosen me një nga zyrtarët e një agjencioni të fluturimeve.
Acarimi mes tyre vjen pasi pasagjerët detyrohen të paguajnë biletën e fluturimit për të dytën herë.
