Të zotërosh një Porsche 930 Turbo origjinale është një ëndërr për shumë njerëz dhe çmimet e larta e bëjnë atë gjithnjë e më të papërballueshëm.
Megjithatë, Daniel Boyce nga Florida vendosi për një veprim radikal për të realizuar ëndrrën e tij, transmeton Telegrafi.
Në vend që të kursente para ose të merrte hua, Boyce hartoi një plan dhe vodhi një njësi të përsosur të një Porsche 930 Turbo 250 mijë dollarësh nga një muze, më pas e regjistroi atë si një 911 krejtësisht të ndryshme duke përdorur dokumentet e veturës së shkatërruar më shumë se dy dekada më parë.
Gjatë vjedhjes, Boyce zhvendosi shtatë vetura në muzeun e veturave klasike Sarasota. për të arritur te një Porsche 930 Turbo e vitit 1977.
Punonjësit e muzeut e “ndihmuan” në një farë mënyre, sepse i lanë çelësat në coupe metalike ngjyrë kafe. Policia mbërriti në muze të njëjtën mbrëmje pasi ra alarmi, por nuk pa asgjë të pazakontë.
Mirëpo, pasoi një telefonatë e dytë dhe më pas policët gjetën shenja në derë dhe vunë re se një veturë mungonte.
Porsche i vjedhur është regjistruar nga kamerat e vëzhgimit në orën 05:14, por më pas veturës i kanë humbur të gjitha gjurmët.
Disa ditë më vonë, muzeu mori një informacion se Boyce ishte parë me një Porsche gri në një magazinë. Hetimi zbuloi se 36-vjeçari kishte regjistruar Porsche-n kafe në Triton Engineering duke përdorur numrin e shasisë së një 911 tjetër që u shkatërrua 23 vjet më parë dhe u shit për skrap në Kaliforni.
Fatura e shitjes, dokumenti i regjistrimit të Maine, letra e verifikimit të odometrit dhe dokumentet e tjera të përdorura për regjistrimin e Porsche-s u gjetën të rreme dhe Boyce ishte i përfshirë në mashtrim.
Ai u arrestua pasi nuk u paraqit pas një akuze për vjedhje dhe kur policia mori një urdhër kontrolli në celularin e tij, u zbulua një foto e veturës së vjedhur, së bashku me numrin e njësisë së ruajtjes. Në këtë mënyrë efektivët e policisë arritën të gjenin veturën. Boyce është aktualisht në burg ndërsa policia po heton. /Telegrafi/