Portieri i Ballkanit, Stivi Frashëri, u sulmua nga tifozët gjatë incidenteve që shpërthyen të dielën në ndeshjen e zhvilluar si mysafir te Gjilani.
Tifozët vendas hynë në fushën e Stadiumit të Qytetit në Gjilan dhe gardiani mysafir u sulmua dhe mes tjerash u godit në kokë.
Ai u dërgua për trajtim mjekësor me autoambulancë dhe më pas u shpërndanë disa fotografi, ndërsa gjatë ditës së sotme (e hënë) ka ardhur reagimi i tij në rrjetet sociale.
“Faleminderit shumë për mbështetjen dhe interesimin tuaj. Momentalisht jam duke u kontrolluar nga stafi mjekësor i Ballkanit dhe drejtuesve në tërësi, me një përkujdesje shembullore”.
“Sot, po kryejmë edhe analiza më të detajuara për të pasur një pasqyrë të qartë të dëmtimit. Shpresoj që çdo gjë të jetë pa problem…”.
“Më vjen shumë keq që nuk mundem t’ju kthej përgjigje të gjithëve. Ju dua shumë! Faleminderit për gjithçka”, ka shkruar portieri në InstaStory. /Telegrafi/
