Presidenti i SHBA-së, Joe Biden nuk po i mbështet plotësisht qëllimet e Izraelit në luftën e tij kundër Hamasit në Rripin e Gazës.
Kështu ka thënë ministri i Sigurisë Kombëtare i ekstremit të djathtë të Izraelit, Itamar Ben Gvir për Wall Street Journal, shkruajnë mediat e huaja, përcjell Telegrafi.
Në vend që të na japë mbështetjen e tij të plotë, Biden është i zënë me dhënien e ndihmës humanitare dhe karburantit (për Gazën), e cila shkon në Hamas”, tha ai.
“Nëse Trump do të ishte në pushtet, sjellja e SHBA-së do të ishte krejtësisht e ndryshme”, shtoi Ben Gvir, kreu i partisë nacionaliste të Fuqisë Çifute.
Benny Gantz, një ish-ministër i mbrojtjes dhe një anëtar i kabinetit të luftës të Izraelit, u kundërpërgjigj Ben Gvir, duke i quajtur komentet e tij “të papërgjegjshme” në një postim në X.
“Lejohet të ketë mosmarrëveshje, edhe me aleatin tonë më të madh dhe më të rëndësishëm (Shtetet e Bashkuara), por ato duhet të zhvillohen në forumet përkatëse dhe jo në deklarata të papërgjegjshme në media, të cilat dëmtojnë marrëdhëniet strategjike të shtetit të Izraelit, sigurinë e shtetit dhe përpjekjet e luftës në këtë kohë”, ka thënë ai.
Kreu i opozitës Yair Lapid kritikoi gjithashtu komentet e Ben Gvir, duke thënë se intervista ishte “një sulm i drejtpërdrejtë ndaj pozitës ndërkombëtare të Izraelit, një sulm i drejtpërdrejtë ndaj përpjekjeve të luftës, e dëmshme për sigurinë e Izraelit dhe, mbi të gjitha, dëshmon se ai nuk kupton asgjë për politikën e jashtme”.
Netanyahu është nën presion nga të gjitha palët, pasi mosmarrëveshjet në koalicionin e tij dhe kabinetin e luftës kërcënojnë ta sjellin qeverinë në një pikë thyerjeje dhe mitingje të mëdha në të gjithë vendin po kërkojnë që ai të japë dorëheqjen dhe ta dërgojë vendin në zgjedhje. /Telegrafi/