Në një atmosferë festive dhe reflektimi, këngëtari The Victor ka zgjedhur një datë simbolike për të lansuar projektin e tij më të ri muzikor.
Kënga e re, e cila mban titullin “Better Days” – “Ditë më të mira”, u publikua sot, më 17 shkurt, duke shënuar 16-vjetorin e Pavarësisë së Kosovës.
“Ditë më të mira” nuk është thjesht një këngë; ajo është një porosi shprese dhe optimizmi që drejtohet nga zemra e The Victorit drejt çdo fëmijë që, si ai dikur, përjeton sfida të rënda.
Kënga sjell me vete një ndjenjë të thellë empatie dhe lidhje të veçantë me të gjithë fëmijët anembanë botës që janë të detyruar të përballen me realitete të ashpra dhe konflikte të dhunshme.
Lindur në vitin 1998, gjatë periudhës më të përgjakshme të historisë së Kosovës, The Victor përdori zërin dhe talentin e tij për të ndarë përvojat e tij personale dhe për të ndriçuar rrugët e të tjerëve.
Publikimi i “Better Days” në këtë ditë të shënuar nuk është rastësi. Përmes kësaj kënge, The Victor dëshiron të kontribuojë në një të ardhme më të ndritur për Kosovën dhe për të gjithë ata që, si ai, janë rritur në një vend që kaloi shumë dhimbje e sfida.
“Better Days” është thirrje për të shpresuar dhe punuar për një botë ku çdo fëmijë mund të shijojë ëndrrën e një jete me më pak dhimbje dhe më shumë mundësi. /Telegrafi/
