Kryetari i Kuvendit, Glauk Konjufca ka njoftuar se i ka përcjellë në Gjykatën Kushtetuese, amendamentet kushtetuese lidhur me vetingun në drejtësi.
Përmes një postimi në Facebook, Konjufca ka shkruar se vetëm përmes vetingut Kosova do të jetë shtet i së drejtës.
“Në përputhje me përgjegjësitë kushtetuese dhe pas përfundimit të punës së Komisionit Ad Hoc për vetingun në sistemin e drejtësisë, sot, i kam përcjellur amendamentet Kushtetuese në Gjykatën Kushtetuese për të marrë përgjigje nëse të njëjtat janë në përputhje me Kapitullin II të Kushtetutës së Republikës së Kosovës.
Jam i gëzuar që reforma në drejtësi është në rrugë të mbarë. Vetëm përmes saj Republika e Kosovës do të jetë shtet i së drejtës dhe do të kthehet besimi i qytetarëve në institucionet e drejtësisë”, ka shkruar Konjufca.
Kryeparlamentari ka falënderuar anëtarët e Komisionit Ad Hoc, përfaqësuesit e Ministrisë së Drejtësisë dhe institucioneve të drejtësisë, partnerët dhe ekspertët për punën e tyre në këtë proces të rëndësishëm.
E ministrja e Drejtësisë, Albulena Haxhiu e ka quajtur lajm shumë të mirë dërgimin e amendamenteve kushtetuese në Gjykatë.
“Lajm shumë i mirë dërgimi në Gjykatën Kushtetuese i amendamenteve kushtetuese për vetingun në sistemin e drejtësisë. Falënderoj Kuvendin për bashkëpunimin në këtë proces të rëndësishëm!”, ka shkruar Haxhiu. /Telegrafi/
