Lëvizja Vetëvendosje sot ka mbajtur tryezë me njohës të arsimit për të debatuar mbi Projektligjin për arsimin e lartë.
Aty u theksua se projektligji ka mangësi të mëdha dhe duhet shqyrtuar me kujdes, për ta ndryshuar me anë të amendamenteve.
Shefi i Grupit parlamentar i Lëvizjes Vetëvendosje, Glauk Konjufca tha se problemet në arsim janë evidente.
Sipas tij, ndikimet politike janë të larta dhe kushtet që mësojnë studentët janë të dobëta.
Ndërsa, udhëheqësi i Komisionit parlamentar për arsim, Ismajl Kurteshi tha se ky komision e ka shqyrtuar në parim këtë projektligj, ndërsa pas votimit në lexim të parë do të fillojë puna e mirëfilltë për të.
Sipas tij, atëherë komisioni mund të punojë rreth ndryshimeve në këtë projektligj me anë të amendamenteve rreth 40 për qind të ligjit.
Dekani i Fakultetit Filozofik, Bujar Dugolli tha se edhe më herët ka pasur ministra që kanë iniciuar proces ndryshimet për Projektligjin për arsim të lartë, mirëpo siç thotë ai në shumicën e rasteve propozimet e tyre janë deformuar dhe nuk janë pasqyruar si duhet.
Ndërsa, kishte një porosi për institucionet shtetërore që të fokusohen më shumë në sektorin publik se sa në atë privat.
Për trupën e Agjencisë Kosovare për Akreditim tha se ministri nuk duhet të emëroj këta sepse po vendosen me direktiva politike.
“Ministri nuk duhet të emërojë trupin e AKA-së, sepse po emërohen me direktiva politike. Duhet të ndërpritet se është një organ qe duhet të veprojë në mënyrë profesionale”, tha Dugolli, raporton KP.