Me veshje kombëtare, Rita Ora uron 13 vjetorin e Pavarësisë: Urime Kosova jonë

Artistja shqiptare me renome ndërkombëtare, Rita Ora, i ka bërë një urim të veçantë shtetit të saj të origjinës, në 13-vjetorin e Pavarësisë së tij.

Këtë gjë ajo e ka bërë përmes dia fotografive të publikuara në rrjetet sociale Facebook dhe Instagram, ku shfaqet me veshje kombëtare – fotografi këto të cilat janë realizuar në prapaskenat e xhirimeve të kilipit të saj më të fundit.

Në një nga imazhet kryesore, Ora shfaqet duke bërë shqiponjën me duar, ndërsa pozon me veshjen tradicionale që ia punoi stilisti kosovar, Valdrin Sahiti.

“Urime Dita e Pavarësisë Kosova! Urime 13 vjet pavarësi Kosova jonë”, shkroi këngëtarja 30-vjeçare në mbishkrimin e këtyre fotografive.

Kjo paraqitje e saj me veshje kombëtare vjen nga klipi i saj i fundit “Big”, i cili u publikua javën e kaluar, në një bashkëpunim me reperin Gunna dhe DJ-të e famshëm Imanbek dhe David Guetta.

Kënga është pritur jashtëzakonisht mirë nga publiku ndërkombëtar, dhe aktualisht renditet si kënga e pestë më e dëgjuar e momentit në platformën më të madhe të distrubuimit muzikor në botë, Spotify – gjë të cilën këngëtarja Ora e potencoi gjithashtu në postimin për urimin e pavarësisë.

“Ju e bëtë të qeshur këtë vajzë të vogël sot, si e pesta në top 5 në Spotify me ‘Big’. Uau, faleminderit shumë të gjithëve”, shkroi Rita.

Klipi i këngës “Big” përndryshe u xhirua në Bullgari, dhe koncepti i tij ka qenë transmetimi i një kulture të mbarë Evropës Lindore. /Telegrafi/