Ndeshja kundër Izraelit, ndaj një kundërshtari direkt për të paktën vendin e tretë në grup, është më delikatja për Shqipërinë në këtë fushatë eliminatoresh për “Rusia 2018”.
Këtë e kanë të qartë të gjithë futbollistët kuqezi, të grumbulluar nga Gianni De Biasi për takimin e radhës. Mes tyre është edhe Federik Veseli, i cili në konferencën për shtyp të zhvilluar në ambientet e “Tropikal” në Durrës e pranoi se pikërisht para Izraelit presioni është edhe më i madh edhe se ndaj Spanjës.
“90 për qind e skuadrave që luajnë ndaj Spanjës humbasin, kështu që edhe nëse del pa pikë ndaj këtij kundërshtari nuk është ndonjë çudi. Por, kundër skuadrave më të vogla presioni është edhe më i madh. Prandaj e them se kjo është ndeshja më e vështirë për ne në këtë grup”, është shprehur Veseli, citon SuperSport.
Shqipëria dhe Izraeli kanë grumbulluar nga gjashtë pikë në tri takimet e para ndaj rezultatet në përplasjet direkte më shumë mundësi do të përcaktojnë se cila skuadër do të ketë më shumë pikë në fund të eliminatoreve. Barazimi në fushën tonë nuk është opsioni më i mirë për kuqezinjtë, por nëse vjen nëpërmjet një performancë shumë të mirë atëherë do të ishte më e pranueshme.
“Nuk mund të them se jam i kënaqur me barazimin. Varet sesi do të shkojë loja. Nëse luajmë shumë mirë, por për arsye të ndryshme nuk arrijmë të fitojmë, sërish do të isha i kënaqur”, ka theksuar lojtari.
Frederik Veseli e ka veshur në pesë raste fanellën e Shqipërisë, në humbjen 2-0 ndaj Francës në finalet e ‘Euro 2016’, si dhe në katër ndeshje miqësore, në barazimet 2-2 me Kosovën dhe Gjeorgjinë, në fitoren 2-0 me Luksemburgun dhe në barazimin pa gola kundër Marokut në “Loro Borici”.