Më 16 maj të këtij viti, Behgjet Pacolli kishte dridhur skenën politike kur vendosi të hynte në koalicion me LDK-në. Nga villa e tij në Hajvali, ai theksoi se ka për qëllim ta ndryshojë Kosovën.
“Gjithmonë kemi kërkuar një platformë nga ku mund ta ndryshojmë Kosovën”, kishte deklaruar Pacolli pas nënshkrimit të koalicionit me LDK-në.
Pas shpalljes së rezultateve të zgjedhjeve të 11 qershorit, u përfol që AKR mund t’i bashkohet PAN-it, por një gjë të tillë gjatë tërë kohës e kishte mohuar vetë Pacolli.
Të njëjtën gjë e kishte bërë edhe Agim Bahtiri duke thënë se AKR nuk do t’i bashkohet PAN-it, duke thënë se e keqja më e madhe e vendit është PDK.
E në njërin prej emisioneve kryetari i PDK-së, Kadri Veseli e kishte quajtur Behgjet Pacollin, politikan të dështuar.
“Baci Behgjet është biznesmen i suksesshëm por një politikan i dështuar”, kishte thënë Veseli.
Mirëpo pavarësisht kësaj mbrëmjen e së hënës, Pacolli dhe Veseli nënshkruan marrëveshje. /KlanKosova/Telegrafi/
