Kryetari i Partisë Demokratike të Kosovës, Kadri Veseli ka thënë se edhe beteja me Gjykatën Speciale do të jetë triumfuese për Kosovën, duke shprehur kështu përkrahjen e tij ndaj presidentit të vendit, Hashim Thaçi, i cili sot do të intervistohet nga Gjykata Speciale në Hagë.
Veseli përmes një postimi në Facebook ka thënë se lufta e Ushtrisë Çlirimtare të Kosovës, ka qenë e drejtë, e pastër e triumfuese.
“Triumfuese do të jetë edhe kjo betejë e Kosovës, në të cilën sërish do të jemi bashkë me vëllain tim nga lufta, Hashim Thaçi. Sepse, e drejtë, e pastër dhe triumfuese ishte edhe lufta jonë çlirimtare. Prandaj, po, dielli do të lindë përsëri”, shkruan Veseli.
Ndryshe, Presidenti i vendit, Hashim Thaçi sot pritet të intervistohet nga Prokuroria Speciale në Hagë.
Mbrëmë pak përpara nisjen për në Hagë presidenti Thaçi tha se është nisur drejtë Hagës për të filluar e fituar një betejë të re, kësaj here me drejtësinë ndërkombëtare e cila e ka vendosur nën dyshimin si i përfshirë në krime lufte, shkruan Telegrafi.
Kujtojmë se më datë 24 qershor 2020, Zyra e Prokurorit të Specializuar ka njoftuar se Presidenti i Kosovës, Hashim Thaçi dhe kryetari i PDK-së, Kadri Veseli janë dy të akuzuarit e parë që do të paraqiten në Gjykatën Speciale në Hagë. /Telegrafi/
